2 Peter 3
1 親愛个朋友啊，𠊎這下寫給你等个係第二封信仔。在兩封信仔底背，𠊎攏總提醒你等這兜事情來激發你等純潔个思想。
2 𠊎愛你等記得古早時該兜聖先知所講个話，還有𠊎等个主—救主通過眾使徒傳給你等个命令。
3 最重要个係，你等一定愛知，在這末後个日期，有兜人受私慾个轄制，會出來㩢耍你等，
4 講：「佢毋係應許愛再來嗎？佢在㖠位呢？𠊎等个祖先攏總過身了，總係萬有敢毋係還㧯太初創造个時共樣嗎？」
5 佢等佻佻毋記得上帝在太初用佢个話創造天地這個事實。地係對水、通過水來成形个；
6 舊个世界也係對水，就係大水來消滅个。
7 這下个天㧯地也共樣係憑上帝个話保留下來个，等到毋信个人受審判、愛消滅該日，就愛用火燒掉。
8 總係，親愛个朋友啊，有一件事你等毋好毋記得：在主看來，一日像千年，千年像一日。
9 主毋係像一般人所想个，延延纏纏毋實現佢个應許。其實，佢係寬容你等；因為佢毋願意有一個人沈淪，係願意人人都來悔改。
10 總係，主再來該日就像賊仔忽然來到一樣。在該日，諸天會在大聲中消失，星辰會在烈火中燒掉，大地㧯萬物攏總會消滅掉去。
11 既然這一切愛恁樣毀滅掉，你等行事做人愛樣般呢？你等應當愛過聖潔㧯虔誠个生活，
12 來等候上帝个日仔，催迫它趕緊來。在該日，諸天會被火燒滅掉，星辰會在烈火中鎔掉。
13 總係，𠊎等所等个係上帝所應許个新天新地；在該位，正義永遠常存。
14 所以，親愛个朋友啊，既然你等等候該日，就應該在上帝面前盡力追求聖潔，過無好嫌个生活，同佢和好。
15 愛用𠊎等个主个寬容做你等得救个機會，像𠊎等親愛个兄弟保羅用上帝所賜个智慧寫信仔給你等一樣。
16 佢在所有个書信底背全部有講起這個事情。佢个信仔底背有兜所在盡難了解，該兜無知㧯反覆無常个人就隨便曲解，像佢等曲解其他个經文一樣，結果就係自取滅亡。
17 總講，親愛个朋友啊，既然你等知這兜事情，就應該提防，免得被該兜壞人錯誤个言論拐走，害你等離開堅固个立場。
18 你等愛在𠊎等个主—救主耶穌基督个恩典中，並對佢个認識上，繼續長進。願榮光歸給佢，對這下一直到永遠！阿愐。